Pakistan Ram Vur Leh Lung Tawlh Nasa Takin A Chhilh Hmeichhe Naupang Chu Darkar 18 Hnuah Nungdama Hmuh A Ni

Samina tia koh kum 12 mi Pakistan hmeichhe naupang chu vur leh lung tawlh nasa tak karah darkar 18 zet a awm hnuah nungdama hmuh a ni. Samina hi Bakwali khua, Neelam Valley line of control bula thingtlang khuaa cheng a nia Muzzaffarabad hospital ah January ni 15 khan First Aid pek a ni. An in chu vur leh lung tawlh hian a hual vel vek niin an sawi.

Samina Bibi hi tianga vur tawlh kara an room chhunga atan lai hian nasa takin a auva hei hi midangten hriain an chhanchhuak thei ta a ni.

Thawhtan nia Neelum valley, Pakistana vur leh lung tawlh a thi zat hi Pakistan Official sawidanin 74 an nih thu an sawi. Pakistan leh Afghanistan a khaw awmdan inthlak thut avang hian mi 130 chuang an thi tawh a ni.

Samina erawh mi vannei chungchuang a ni. Muzzafarabad hospital a mutna khum atanga Reuters a hrilh danin “Thi mai turah ka inngai hman hial a ni” a ti. Ani bakah hian helai chhiatna thlenna hmun atanga thlawhna a thiarchhuah midang hliamte pawh he hospital ah hian an dahkhawm hlawm a ni.

Samina a nu tan mawlh hian a fanu chhanchhuaha a awm chu thil mak leh lawmawm chungchuang a ni. He hmeichhia hian a fapa neihchhun leh a fanu dang pawh a lo hloh tawha Samina bak innghahna a nei lo a ni. A fanu chhanchhuak tura an beih mek lai pawh hian zanah pawh mutmu a tuah thei lo tih a sawi. A ke ruh a tliah bakah a ka atangin thi a chhuak nual tih tarlan a ni.

Samina te chhungkua hi meilum thut huala an ai mek laiin vawi lehkhatah vur leh lung chu alo tawlh thut tih an sawia inralrinna hun pawh a awm lo niin an sawi.

Pakistan National Disaster Management Authority thu chhuahin a tarlan danin ni hnih vel liam ta atanga khan mithi an hmuh belh niin an sawia an vaiin he chhiatna a thite chu mi 100 an tling chho niin an sawi. Source:ASO

Be the first to comment on "Pakistan Ram Vur Leh Lung Tawlh Nasa Takin A Chhilh Hmeichhe Naupang Chu Darkar 18 Hnuah Nungdama Hmuh A Ni"

Leave a comment

Your email address will not be published.


*


This site uses Akismet to reduce spam. Learn how your comment data is processed.