Tanpui Dilna: A Naute Laksak Hlau

Mizo nu pakhat chuan, a manganna thu ti hian a rawn ziak. “Kan pa nen hian kum 1 leh thla 3 kan innei hnuah nau ka pai a, naute thla 8 mi ka pai lai mekin zan khat chu ka hriat phak loh leh rin phak lohin chhungkaw buaina a rawn chhuak thut ta mai a, a u pawisa a bo a, a u chuan min puh ta a.

Kan pa hi chhungte hlau em em mi a nia, mahse ka dem lo, naupang ber a nih avangin ka tia, ka hrethiam zel a. Mahse chu mi zan kher kher chuan hriatthiam har ka va ti kher em! Kum khat leh tih kan innei a, vawikhat mah kan inhau ngai lo, inhau tur dinhmunah pawh kan awm ngai lo.

Mahse, a mak hi ka ti kher mai, kha tia a u nen boruak kan neih takah chuan kut min thlak ta a, chhuak rawh min ti ta a, thudik leh dik lo pawh hriat duh lo khawpa ka that dawn che min tih avangin ka thih aiin ka chhuak mai ang, mahse thudik i hriat hunah inchhir ngai suh ang che ka ti a, ka chhuak ta a, veng hran ka nih avangin.

Zan a lo rei ve tawh bawk nen ka chhungte ka phone a, an la thei lo a, motor hman mai tur ka hriat loh avangin kein kan veng chu zanlaiah ka pan ta a. Kan in chu Pathian zarah dam leh tluang takin ka thleng a. Ka chhungte engkim ka hrilh a, ka u thinrim lutuk chuan FIR kan thehlut dawn a nia a tia, mahse ka duh lo, a chhan chu intihbuai vak chu ka ti a, ka khap ta a.

Kut min thlak pawh kha ka chhungte ka hrilh lo, a chhan chu ka u in a hriat chuan a thinrim ka khap hneh dawn lo tih ka hriat vang a ni. Tunah hian Pathian zarah dam leh hrisel takin Pathianin fanu duhawm tak min pe a, thla 3 na a hmang mek a.

Ka hriat duh chu man kan la inhlan lo a, man hlan loin mipa hian naute a la thei em? Ka naute hi ka damchhan a ni ber tawh mai a, ka naute min laksak leh chuan khawvelah hian dam reng thlakhlelna reng reng ka nei tawh lo. Tunah hian naute pa hi a rawn leng a rawn leng leh tawh a, pa ka nei tawh lova, ka u te nupa an awm bawk si lo.

Ka nu leh naute nen chauh kan khawsa a. Rawn kal tawh suh ka tih pawhin engah mah min ngai lo. Ngawi rengin a lo thu a, a haw leh tawp zel. Khawngaihin in thurawn min han pe sup sup teh u! Engtia tih chi nge ni ang? tiin.

Be the first to comment on "Tanpui Dilna: A Naute Laksak Hlau"

Leave a comment

Your email address will not be published.


*


error: Content is protected !!