Archangkawm That Zia Hi I Lo Hre Ve Ngai Em?

Archangkawm hian Flavones pathum – Bicalein, Oroxylin A leh Chrysin a pai a Alkaloids- tannic acid, sitosterol leh galactose a pai a. Hengte bakah hian tetuin, oroxindin, emodin, p-coumaric acid, scutellarein-7-rutinoside, prunetin, B-sitosterol etc. a pai bawk a ni.

Archangkawm thatna te
lavones pathum, Bicalein, Oroxylin A leh Chrysin a awm avangin cancer damdawi atan, a bik takin thin cancer tan hman thin a ni a, cancer veng theia ngaih a nih bakah natural antibiotic niin natna hrik a that thei a, nachhawkna atan pawh an lo hmang fo thin.

A zung hi ruhseh leh ruhchuktuah nâah te, zun kawng tha lovah te, kawthalo-ah te, chaw ei tui nan te, chaw pai tawih (digestion) puitu atan te leh hritlang awm nãah te hman thin a ni.

A rah hi lung tan a tha a, thisen a tithianghlim thei a, chaw pai tawih a pui a, pån leh hliam tan a thain a tidam hma a. Vun a tinung a, hmeichhe lam that lohna hrang hrangah pawh hman fo a ni bawk a.

Taksa chak lohna hrang hrang, a bik takin kum upa lam tan thluak leh taksa tihchak nan a tha a, parkinson’s natna leh alzheimer’s natna enkawl nan pawh an hmang thin.

Naupang rilru lam buaina nei enkawl nan te, khawsik, asthma, la vůng (spleenomegaly), khuh, tháwkna dâwt natnaah khâk tihchhuah tam nan te leh ruh leh taksa nãa bel atan te an hmang bawk thin.

A zung, a hnah leh a rah hi damdawi atan a hman theih vek a, a phuta siam hi ni khatah 3gm atanga 6gm vel ei tur a ni a, a tuiin ni khatah gm khat, ni khatah vawi hnih thum eia hman tur a ni. Taksaa nghawng tha lo, side effects a neih hriat a ni lo va, naupai tan erawh mithiamte ráwn hmasak a tha ber ang.

Chawhmeh atan hmangin kan ei thin a, bazarah pawh lei tur a tam thei hle mai a. Kan duh luatah hian a kung te kitin he ramhmul damdawi (medicinal plant) tha leh tangkai tak hi kan ti rêm zo vang tih erawh a hlauhawm hle mai. A tiremtu ni lova a humhalhtu kan nih a pawimawh hle mai. Pathianin kan chhehvela thing leh thlaiahte hian damdawi a dah a; humhalh a, a thatna hmu chhuak a, hman tangkai hi kan mawhphurhnaah a dah ve thung niin a lang.

Mizoram Medicinal Plant Board hian chak takin hma la se, Chawhmeh atana hmang ringawt lo hian damdawi atana ei theihin min chhawpchhuahsak thuai se a nghahhlelhawm khawp mai. Chawhmeh atana hman ringawt hi chuan a thatna kan hmang tangkai tak tak lo maithei a ni.

Hmangchang Group
TBC. Marenga

Be the first to comment on "Archangkawm That Zia Hi I Lo Hre Ve Ngai Em?"

Leave a comment

Your email address will not be published.


*


error: Content is protected !!