Unau Inhmangaihna Chu

Unau pahnih hi an awm a. Pakhat zawk chu a nupui fanau te nen an khawsa a. A naupang zawk erawh chu nupui nei lovin a parawl thung.

An eizawnna chu Leileta Buh hmun siam a ni a. A hranga siam lovin an intawm a, kumtawpa an seng hnu ah inzat chiahin lungawi takin an insem thin a.

Zankhat chu a naupang zawk chuan a rilruin “Ka u te chhungkua hi an hautak si a, kei erawhchu ka mamawh a tlemin ka ei seng lo a ni si. Hetianga inzat chiaha insem hi a tha in ka hre lo’ tiin a buh zem atang chuan zantin tin 1 rut chhuakin a unaupa buhzemah chuan a va chhung ru thin a.

Chutihlai vek chuan a upa zawk chuan a rilruin, “kei chu nupui fanau nei ka ni a. Ka damloh nikhua pawhin min enkawltu tur nupui fanau ka nei a. Ka nau hi chu a mal ngawih ngawih a, a damlohin tunge enkawl ve ang. Hetianga inzat chiaha Buh kan insem hi a tha lo ve’ tiin a buhzem atang chuan zantin tin 1 rut chhuakin a nau muthilh hlanin a va chhung ru thin bawk a.

An Buh zema buh chu zantin rut chhuak si, ni rei tak hnuah pawh a phai thei reng reng lo chu mak an ti ru hle a. An thiltih erawh an sawi chhuak duh lo ve ve thung a.

Zankhat erawh chu thim thamah Buh an dah ru ve ve tur chu an insu palh ta hlauh mai. An chanchin an sawi dun hnu chuan an inkuah ta vawng vawng a.

Midangte chunga duhsakna leh lainatna kan lantir hi a thlawn ngai lo. A lo let leh ziah. A ruka thil tha tih hriat chhuaha a awm hian a hlimawm thin.

Mizo Archive

Be the first to comment on "Unau Inhmangaihna Chu"

Leave a comment

Your email address will not be published.


*


error: Content is protected !!