Dam Lo A Nupui Engmah Tithei Lo A Rinawm Loh San- A Hnua Thil Thleng Chu

A chang hi chuan hringnun hi a buaithlak chang a tam hle. Mipate hian hmeichhiate hi a tlangpui chuan kan ngaihsaka, kan ngaihven em em țhin. Țha takin kan enkawla ven him reng kan duh țhin. Mipa tam tak chuan în chhung hna thawh te an puia, an duh leh châk zawng te, an dil hmasak kher ngai loin, an lei sak țhin.

Mipa dik tak thinlung ah chuan hmeichhia chu ngaihsak tur leh hmangaih tur, tih hi a awm ngei ngei țhin. An nu hi nu hmel țha tak leh ngaih no bei tak a ni a. Engtiklai pawh’n a hmel ah hlim hmel hmuh tur a awm țhin. An pa nen hlim taka awm dun reng theih hi a duh thusam a ni a.

A hlimna ka ni ang a, tichuan a ni’n min veng him ang a ti țhin a. Nimahsela, hringnun hi sawi lawksa theih a ni silova. Nikhat chu, computer nen hna thawkin zan tlai tak thleng a menga, a tuk zing khum ațanga a tho chiah chu a lû a hai em em mai a, khawvel hi a vir vut vut emaw a ti hial a. Chuti chuan, rei lotê ah nikhaw hre loin a awm zui ta nghal a.

A harh leh chuan damdawi în ah alo mu reng tawh a. An pa a bula lo ding chu a hmu a, a țahna vangin a mit te a sen zo tawh a ni tih a hriat theih a. A thil hmuh chuan a ti thlabar a. A biang ah mit tui a luang chhuak a. A kut ding lam a che thei lo va, a thaw hip pawh pipe hmangin oxygen a hip thei țawk a ni a. Zawhna tam tak leh rilru mangannain a khat a. A kut ang bawkin a ke ding lam a che thei lo bawk a, chuta tang chuan a taksa zatve a zeng a ni tih a hrethiam ta a. A mit tui a sur tawp thei lo va, tun ang hun ah hian eng nge a tih dawn a hre lo.

A kal thei tawh dawn lova, a chhungte a enkawl thei tawh dawn lova, a fanu pawh a infiampui thei tawh dawn lova. A thlakhlelh zawng zawng chu atan mangchhia ah an chang zo ta si a. Engtianga rei nge, ni engzat nge, thla eng zat nge, kum eng zat nge, ni ang tih atan chuan ngaihtuah ngam pawh a ni lo. A hlimna zawng zawng chu boruak ah thli chhe chem ral ang maiin a tham ral ta si.

A mahin chaw a ei thei lova, thawmhnaw a inthlak thei lova, chu mai bakah restroom a kal thei lo bawk a. Thla hnih engmah tithei lova damdawi îna a mut hnu ah phei chuan an pain a ngaihsak lo țan hle niin a hre bawk a. Ahma chuan a tui a hal chuan in tur tui a rawn lak maia, a ril a țam chuan ei tur a rawn lak mai țhin a. Mahse tunah chuan engmah a tihsak țha duh tawh lo. Ei tur a rawn ken sak tawh lova, restroom a kal duh chang pawhin a hruai tawh lo.

Amaha kal turin awrawl alo san khuma, thawmhnaw pawh a suk sak tawh dawn loh thu a hrilh nghal bawk a. A pasal chuan a ngaihsak lo tawlh tawlh mai a, achang chuan damdawi înah pawh a rawn kal tawh ngai lo. Chuvang chuan ka pasal hian min hmangaih tawh lo a ni, tiin a ngaihtuah a, a pasal a chhan phah tur chuan a rilru a tina zual em em a. Nitin mit tui nen khum chung ah a hun a hmang țhin.

Dam chhuah tumin a bei nasa em ema, doctor te pawh chuan nasa takin an pui bawk a. A taksa a tih chet theih nan hma an lak puia, therapy an lak pui reng a. Tichuan, ni tam tak damdawi înah, engmah tithei lova a mut hnu chuan, țhat lam a rawn pan cho ve thei ta a. A pasalin nasa taka a nawr țhin leh amaha indawm kang tura a ti țhin te kha a rilru ah a awm reng a. An inthen ngei a ngai dawn niin a hria a. A taksa tihchet tuma a beih nasat em vang chuan a dam chak hle mai a, doctor te pawhin mak an ti hial a.

Thla tam tak enkawl ngaia a awm hnu chuan vanneih thlak takin a ke ngeiin a kal ve leh thei ta hlauh mai a. A pasal chuan an nu chu în lamah a hruai haw a. Mahse a dam loh laia an pa awm dan avang chuan a inngaihtuah buai hle a. A kea kal turin a tilui țhin kha a ni si a. În an thlen hma chu engmah an sawi lo. În chhung a luh dawn thleng chuan a inngaihtuah buai em vangin a mit a ching reng a. Chutih lai chuan an pa chuan a hmangaihna tih lan nan surprise alo buatsaih a. Inthen tura a rilrua thuthlukna a siam dawn ruai chuan an pa chuan i mit meng rawh le a rawn ti a.

An în chu rose par in alo chei khat vek mai a. An pa chuan tihian a hrilh a, I dam loh laia i kea ding tura ak tih che khan hrehawm i tih aia let tam takin hreawm ka ti a sin, i dam vat theih nan khatia ka tih kha a ngai thlat si a, tiin an nu chu a hrilh a. A hmangaih loh vang a ni lova, midanga a innghah reng chuan a dam vat dawn lo a ni tih a hria a, chuvang chuan amaha indawm kang turin a kalsan a ni.

Be the first to comment on "Dam Lo A Nupui Engmah Tithei Lo A Rinawm Loh San- A Hnua Thil Thleng Chu"

Leave a comment

Your email address will not be published.


*


error: Content is protected !!