A Tir Chuan Hriat Thiam Theihin A Awm Lo- Rosum Vangin A Bialpa Chu

Min min hmangaih a ni tih hriat hi a nuam em ema, mahse i nihna ang anga hmangaih che ni loin, sum vanga hmangaihna mai lo nise, engtinnge i tih zel ang? David tia hriat, tlangval pakhat chuan a hmangaih em em a bialnu hlui nen an inthen dan chanchin tihian a sawi a.

An inngaihzawn lai chuan an hlim dun hle țhin a. Mahse a bialnu chuan hmangaihna thlir lova neih sum a thlir tam zawk tak chin ah chuan ahma angin an hlim dun tak tak thei tawh lo va. A bialpa rethei tak chu midang nen a khaihkhin țhin a. A hma chuan kawng sir chaw dawr ah te chaw an ei mai țhina, hmun changkang leh thil man to an lam ngai lo.

Mahse a bialnu chuan kawng sir chaw dawr vel mai maia chaw ei chu tiin a duh tawh lo va. Hetih lai hi chuan engmah ala hrethiam lo va. Achang chuan a bialnu tihlawm nan a duh ang chu a tih sak ve mai țhin a. A lan dan simple tak avang chuan tumahin mi neinung tak chhungkua ațanga lo sei lian anih an ring lo.

Mahse thu dik chu mi hausa tak chhungkuaa lopiang a ni a. Hausakna tih lan kher hi thil țul niin a hre lo a ni. David te chhungkua chu khawsak dan tur ah chuan an buai lo hle a. Mahse amah ngeia thawh chhuah nei nuam ti mi a ni ve reng reng a. A tirah chuan an chhungkaw chanchin hi a bial chu a sawipui ngai lo va.

Kawng sir chaw dawr ah chaw an ei dun țhin a. Movie an en dun țhin bawk a. Mahse a bialnu chuan midang nen a bialpa chu a khaihkhin țhin a. Mipa dang te chuan an bialnu te thawmhnaw man to tak tak te, smartphone te, handbag nalh tak tak te an lai saka nang chuan kawng sira chaw dawr ah bak chaw pawh min ei pui ngai lo tiin a phun a phun ta mai a.

Chutiang vang chuan an intithiam lo țana, atawpah chuan a bialpa chu rilru na taka siamin a țhen ta a. David chuan atawp nan tiin chaw ei puiah a sawm leh a. A bialnu chuan kawng sir mai maiah a ni leh ang chu. Kawng sira chaw kha a tuina pawh ka hre lo ve, alo ti a. A ni alo thlen chuan David chuan BMW car nen chaw ei turin ava sawm a.

An înah chuan chaw ei turin a hruai lut ta a. An în chhung an lut chiah chu chiahhlawh ten chibai an lobuk a. A nu leh pa te hnen ah chuan, hei hi ka țhian țha ber anih hi tiin a hmelhriat tir a. Tichuan atawp ber atan, David chu, a bialnu hlui nen chuan zanriah hlim takin an kil dun thei a.

Zanriah an kil dun zawh chuan a bialnu hlui chu ava thlah haw leh a. Car ațanga a chhuah dawn chuan, a bialnu hlui chuan, ka tihpalh, ka lo hre lo a ni, a ti a. Mahse David chuan tihian a chang a, a pawi lo ve, i duh ang chu ka pe thei lo che a ni, tiin a thlah liam ta a ni.

Hmangaihna chu sum leh pai vang chauh anih chuan engtikah mah rei a daih ngai dawn lo. Engtik niah emaw chuan midang hausa zawk leh lang nalh zawk i hmu leh ang a, i neihsa duh tawk lohnain a nei leh zel ang che. I nih dan ang anga hmangaihtu, hmangaihna thianghlim hi thlang thiam ang che!

Be the first to comment on "A Tir Chuan Hriat Thiam Theihin A Awm Lo- Rosum Vangin A Bialpa Chu"

Leave a comment

Your email address will not be published.


*


error: Content is protected !!