Khuami Nih An Rem Hnalo Ruangah Lo Thlam Ah Khua A Sa Mi Nu A Tai Tang A Thi

Shan ramkulh Kyaukme peng mi nutung pakhat cu China ram ah a pasal he hlawhfa in rian an rak ttuan ve i accident an rak ton ruangah rian ttuan kho tilo in an um caah khua lei ah an rak kir. Khua lei an kir tiang ah zualhma ngai asi lo nain khuachung luh an sianh hnalo ruangah lo thlam lawng te ah khua an sa in cu nak in cun a taitang a thih beh hi asi.

Hi nu hi Kyaukme peng Khutinh khuami asi i China ram rian a ttuannak ah accident a tong i cu ruang ahcun khua lei ah a kir. Khuami hna le a pasal hi rithaisi ruangah buaibainak an rak ngei bal hna i cu ruangah cun khua chung luh ter sianhlo in an um hna caah lo thlam ah an chungkhat ningin khua an sak hi asi.

Kyaukme peng Namh Khung chiattthat zohkhenhnak phu lutlai U Sai Kuu nih “a hlan ah a pasal hi rithaisi a hman ruangah khuami hna he buaibainak an rak ngei bal. Cu hnuah an nupa in China ram lei ah an rak kal. Accident an va tong i cu ruangah cun khua lei ah an rak kir tthan. Khuami nih an cohlan duh hna lo ruangah lo thlam ahcun khua an sa. Papar (mushroom) a kawlmi pa nih a va hmuh hna i a rak kan chimh” tiah May 22 ahkhan SPM thawngzamh hna sin ah a chim.

Accident an rak tonnak hliamhma he a nupi cu lothlam pher cung lawng te a rak ih ruangah a taitang a thih behnak hi asi i Namh Khung chiatthat zohkhenhnak phu nih Kyaukme khua sizung ah an kal pi.

U Sai Kuu nih “an khua an hlam khawhnak hnga caah khuami kan va ton piak hna lai. Kan si khawh chunngin inn zong sak piak kan timh hna i mi bawmchantu pawl zong nih kan si khawh tawk in kan in bawmhchanh hna lai tiah a an kan ti. A pasal zong cubantuk rithaisi lei buaibainak chuahpi tilo dingin biakamnak minsen kan thuhter ve lai. Minsen a thuh ko ahcun inn kan sak piak colh hna lai” tiah a chim chih. Hi hna nupa hi fa 2 an ngei mi an si i an fapa 2 hna he cun lo thlam ah khua an rak sak hi asi tiah theih asi. Source:SPM

Be the first to comment on "Khuami Nih An Rem Hnalo Ruangah Lo Thlam Ah Khua A Sa Mi Nu A Tai Tang A Thi"

Leave a comment

Your email address will not be published.


*


This site uses Akismet to reduce spam. Learn how your comment data is processed.