Malaysia Ah A Ngeihchun A Phone Le A Phaisa Chuh A Tongmi Myanmar Pa Hitihin Harnak A Tong Chap

Malaysia ram khuasa Myanmar mi pakhat cu leng a chuahnak ah a ngeihchun a phone le a phaisa bawm mifir nih an chuh i an tlik pi dih. Cubantuk a phone chuhtu a hun dawi hna lio ahcun zei a cang theilo in a um i a hun i tthangh ahcun PPUM sizung ihkhun cung tu ah a rak si cang.

A phone le a phaisa bawm chuh a tongmi Myanmar pa a hawipa nih Malaysia ram hrambunh Myanmar mi chiatthat zohkhenhnak phu bawmh a hal hna. Cu hna phu nihcun sizung ah an va kal hnawh i an va ton. Amah chim ning ahcun mifir a dawinak hna ah tilu luannak chungah a tla sual i a ke a kiah chap caah tilu luannak ahcun mah hngallo in a rak um behnak hi asi.

Cuka hrawng aa chawkmi Malaysia rammi hna nih tilu luannak chung i mah hngallo i a it ko mi cu an rak hmuh manh caab palik an chawnh hna i palik nihcun ambulance an auh piak colh ve. A phaisa bawm fir piak a ton ruangah zeihmanh ID le passport tibantuk a ngeilo i a khup ruh a pelh pinah a ke zong a kiak chap rih.

Myanmar mi chiatthat zohkhennak phu nihcun zeizat dah a dih lai tiah sibawi te an hal hna tikah operation tuah ahcun Rm30,000 hrawng a dih lai nak kong le atu tiang sizung a um man hmanh Rm 6,000 hrawng asi cangnak kong kha an rak chimh hna. Sibawi te nihcun a ke operation tuah lo ahcun tan piak a hau lai tiah an ti chap rih hna.

Hi kawlpa te hi Myanmar ram lei ummi hringtu a nu le a naule tete a cawmkengtu hna asi i hringtu a pa cu a um tilo. Cu ruang ahcun zeitin lei hmanh in Myanmar lei in cun bawmchantu a ngeih lo a fiang. Nifatin Myanmar mi chiatthat zohkhenhnak phu cu sizung lei nih phone an rak chawnh lengmang hna caah a hawile tangka Rm3,100 le Myanmar mi chiatthat zohkhenhnak phu nih Rm2,900 chuah piak in sizung in cun an chuah pi.

Myanmar mi chiatthat zohkhenhnak phu nih a herh ning le kan si khawh tawk in kan bawmhchanh ko lai tiin ACTS ah an chiah chung. A hawile le Myanmar ummi a chungkhar hna tu nihcun Myanmar lei kir ko seh tiah an duh piak i amah zong nih cucu a duh tuk ve mi asi. Hi kawlpa hi a min an rak langhter lo nain Myanmar ram a umnak cu Rakhine ramtthen, Taung Gog peng La Moe Bu Shwe Maw khuate asi tiah theih asi.

Nawlnak:kan website ca ttial mi na website ah copy paste tuah piak lo dingin kan in nawl.

Be the first to comment on "Malaysia Ah A Ngeihchun A Phone Le A Phaisa Chuh A Tongmi Myanmar Pa Hitihin Harnak A Tong Chap"

Leave a comment

Your email address will not be published.


*


This site uses Akismet to reduce spam. Learn how your comment data is processed.