Ram Pumpi Lockdown Phung A Buarmi Pa Pakhat Tisartlam Nih A Seh, Minung 2 Palik Nih An Kah That Hna

Africa nichualei ram Rwanda khua ah ram pumpi mipi chawhleh lo ding timi phung a buar mi pa pakhat cu nga sio a kalnak ah tisartlam nih thi lakin a rak seh beh. Cubantuk tthiamtthiam in ram pumpi lockdown phung a buarmi adang minung pahnih hna zong palik nih an kah that ve hna.

Kamonyi peng mayor Alice Kayitesi nih “March 25 ahkhan Nyabarongo tiva ah mipa pakhat cu lockdoen phung buar in ngasio ah a kal i cu nak in cun tisartlam nih thi lak a rak seh hi asi. Coronavirus karhlo nak caah inn um ding timi phung a buar. Amah hi cubantuk phung a buarmi mi tlawmte hna lakah aa tel ve mi asi” tiah BBC thawngla hna sinah a chim.

Rwanda khua ahhin Covid-19 mizaw milu 41 an um hna i March 21 in khan zarh hnih chung an ram lockdown an tuah chung ve hi asi. An ramchung Ministry of Health nih lockdown chung ahhin a herhlo mi rian khar dih ding, khua khat in khua khat i tlawn lo ding in le a herhlo inn leng chuah len lo ding tiah thawng an rak thanh chih.

Rwandan palik nih lockdown phung a buarmi kum 20 minung pahnih zong meithal in an kah that hna tiah Bloomberg nizaan March 26 zingka ahkhan an rak langhter. Mino pahnih an kah that hna timi kong ah Rwanda National Police spokesperson John Bosco nih “palik velh an timh ve hna ruangah a cangmi thil asi” tiah a chim. Source:Asiannewsnetwork

Be the first to comment on "Ram Pumpi Lockdown Phung A Buarmi Pa Pakhat Tisartlam Nih A Seh, Minung 2 Palik Nih An Kah That Hna"

Leave a comment

Your email address will not be published.


*


This site uses Akismet to reduce spam. Learn how your comment data is processed.