Ruah Awk Tam Tuk In Singapore Ram Inn Dot 8 Cung In A Tla Thatmi Myanmar Nu Ruak Kirpi Timh Asi Cang

Singapore ram ah sinum rian a ttuanmi Myanmar nute pakhat cu a liamcia February 9, 2020 zinglei ahkhan Singapore ram Cashew Heights Condo inn dot 8 nak zawn in a tla that. A tla sual mi maw asi a zuang thatmi dah ti hi theih a rak si lo i ca tibantuk zong a ttial takmi pakhat hmanh a rak umlo.

A hawile le Myanmar ram um a chungkhar hna zong hi thawngpang nih khuaruahbar in a rak tuah dih ve hna. A ruang cu hi bantuk thil a ton hlanah a chawnhbiakmi hna le a harnak tibantuk a chimhmi hna minung pakhat hmanh an rak umlo ruang ahhin asi. Hi Myanmar nute hi Singapore ram ruak checkhlattu hna nih a ruak an chekhlat tikah a tlaknak hliamhma in a nunnak a liammi asi tiah an rak fehter.

Hi Myanmar nute hi a min ah Ma Myint Myint Maw ti asi i kum 29 minung asi. Amah hi Myanmar ram Yangon khuami asi. Hi Myanmar nu hi ruahlo piin a tla mi le amah tein a zuang that mi asi lai tiah zumh asi lo i cu ruang ahcun Myanmar ram um a chungkhar hna nih a thihning fiang hlat piak tthan dingin Singapore ram hrambunh Myanmar Embassy ah nawlnak ca an rak ttial ve.

Ma Myint Myint Maw a ruak hi Singapore ram hrambunh Myanmar mi cheukhat le hawilei kawm i bawm in thaizing February 15 zaanlei 3pm ahkhin Myanmar ram Yangon khualei kuat an timh cang tiah theih asi. Myanmar leiin ruak chekhlatnak an tuah ve lai maw timi belte theih asi rihlo.

Philiplines rammi Kuwait ram sinum rian a rak ttuanmi nu zong inn ngeitu hna nih amah tein a nunnak aa la an rak ti i Kuwait ram ruak chekhlatnak an rak tuahmi zong ah ningkel thih in a thi mi aai ko tiah Kuwait ram nihcun result an rak chuah. Asinain Philippines ram an rak kuat hnu a ruak an chekhlat tthan tik ahcun Philippines ram sibawi te nih tlaihhrem le tukvelhmi asi kha an rak theih tthan.

Be the first to comment on "Ruah Awk Tam Tuk In Singapore Ram Inn Dot 8 Cung In A Tla Thatmi Myanmar Nu Ruak Kirpi Timh Asi Cang"

Leave a comment

Your email address will not be published.


*


This site uses Akismet to reduce spam. Learn how your comment data is processed.