Thailand Ah Sinum Rian A Ttuanmi Myanmar Sinum Nute Nih Thailand Tangka Kyat Ting Khat A Hmuhmi A Ngeitu Sin A Pek Dih

Thailand ram ah sinum rian a ttuan mi Myanmar nute nih Thailand ram tangka ting khat leng a hmuh mi cu a ngeitu sinah a pek dih tthan. Hi Myanmar nute hi nidang tawn bang a rianttuan nak mall chung ah inn a thianh len ko i cu lio ahcun Thailand ram tangka ting khat le cheu (kyat ting 67 leng) a ummi tangka bawm a hmuh.

Cu tangka cu a caah san tlai tuk asi ko nain i chiah duhlo in a ngeitu taktak nih hmu tthan seh tiah mall nawlngeitu hna sinah a khirh dih tthan. Tangka a khirhnak kong hi tangka bawm a ngeitu Wachira Charoenan nih a facebook ah hmanthlak he nizaan tihni June 27 ahkhan a rak post. Wachira nihhin a lennak mall chungah a phaisa bawm hi a rak philh sual.

Wachira hi Thailand ram Chanthaburi khua shopping mall pakhat ah June 26 ahkhan a rak lengkai. Amah hi a hawinu pakhat he an rak si i ekinn kal a duh caah a phaisa bawm cu a hawinu sin ah a chiah tak. A hawinu ekinn a va kal ve i a ruah awk hngal tilo in an phaisa bawm cu an i hngahnak zawn ah an kal tak beh.

Wachira nih a tangka bawm a tlau a theih le cangka a va kal hnawh colh nain a rak um tilo i mall chung asi caah ruahchan awk zeihmanh a um tilo tiah a rak ruah. A voikhatnak ah a phaisa bawm ahhin baht ting 3 a rak i sanh hmasa nain a leiba baht ting khat le cheu a rak cham caah a phaisa bawm ahcun Thailand tangka Baht ting khat le cheu hrawng lawng kha a rak taang.

Wichira cu mall chung security hna sinah a va kal i CCTV chek dingin a hal hna. Rianttuanmi pakhat nih cuka innthianh rian a ttuan ve mi Myanmar nu Tin Tin Shu nih tangka bawm aa put lio a hmuhnak kong kha a chim ve. Tin Tin Shu nihhin tangka a rak hmuh le cangka cuka mall tlangtla tu upa hna sinah a rak ap diam cang.

Cuka mall boss te nihcun Wichira cu tlamtling tein a tangka an pek dih tthan. Wichira nih “Chanthaburi Big C mall ruanttuan tu hna le Myanmar nute cungah kaa lawm tuk. Kaa lawmh tuk caah ka lunglawmhnak zong Myanmar nute cung ah ka langhter cang. Tangka tam ngai a um caah ka tangka ka hmu ti lai lo tiah ka rak ruah” tiah a chim. Source:Sanook

Be the first to comment on "Thailand Ah Sinum Rian A Ttuanmi Myanmar Sinum Nute Nih Thailand Tangka Kyat Ting Khat A Hmuhmi A Ngeitu Sin A Pek Dih"

Leave a comment

Your email address will not be published.


*


This site uses Akismet to reduce spam. Learn how your comment data is processed.